EDALONTZIEI

Edalontziak hutsak daudenean
badakizu beteta edo hutsik egon diren
aurretik.
Baina edalontziak apurtzean
apurtuaren oinazea besterik ez da ageri.
Beteta edo hutsik egonaren
arrastorik ez ...
baldin eta zure eskuetan ez bada egon.

OLERKIA 5

Izaki Ahalguztidunak sortu genituen
ulertzen ez genuena ulertzeko.
Eta hain izan ginen inozoak
ulertzen ez genuena ulertzean
ez genuela ulertu
zergatik oraindik ulergarria ulergaitzarekin
ulertzen saiatzen ginen.

OLERKIA 12

Sinesmenak hauskorrak dira.
Gure izatea garatzeko balio duten bitartean
ondo,
baina horrela ez denean
denboragaltze hutsa da
sinesten genuenean sinestea.

FRESKATU DEZAGUN GURE AURPEGIA

Zenbat gustatzen zaidan ikustea jendeak nolako garrantzia ematen dion historiari gaur egun! Harrituta geratzen ari naiz han eta hemen entzuten ditudan iritzi eta diskurtsoekin. Beharbada mundua aldatzen ari denaren seinale bat izango da hori dena. Seguru hori dela.

 

Youtube-ko bideoak ikustea denbora-pasa entretenigarri bat da inolako zalantzarik gabe. Eta bideoa ikusi ondoren horri buruzko iritziak irakurtzea. Jendeak bere jakinduria azaltzeko parada ezin hobeago bat. Eta bideo askotan jendeak historiari buruzko iritzi eta parrafada batzuk idazten dituenean ezin isilik geratu. Mugimendu betean dagoen gizarte honek bere sustraien berri izan nahiko du, eta zerbait jakitean ezin izaten du isilik geratu eta mundu osoari irakurri duen artikulua eta liburu bateko parrafoa goitik behera errepikatzen du. Eta egon zaitez ziur jakintsuetan jakintsuena bezala ikusiko duela bere burua astakeria bat idatzi duen tipoari sekulako eskarmentua eman baitio.

 

Baina hau ez da gauza berria nire inguruan. Oraindik gogoan dut aurreko urtean Amaiurrera egin genuen bidaia. Jakingo duzun moduan 2012. urtea Nafarroako Erresuma konskistatu zutenaren 500. urteurrena ospatzen zen. Ospatu baino gehiago gogorarazi, askok zioten moduan hemen ez baikenuen ezer ospatzeko. Zorionak, ezkontza bat, haur baten munduratzea, bikote baten ez dakit zenbagarren urtea lehen musua eman zutenetik ... horrelako gauzak bai, horiek ospatzen dira, baina konkista bat? Baldin eta garaipena lortu zuenaren bandokoa ez bazara. Baina utz dezagun hau une batez, akaso beste baterako utziko dugu. Kontua da Ezker Abertzalearen barnean kokatutako gazteen artean "Jalgi hadi garaipenera!" ekimena sortu zela konkista hura gogoratze aldera eta mugimendu horretako hainbat gaztek ekimenarekin bat egin zuten, nola ez. Guk Buruntzaldean ere gure aletxoa ipini nahi izan genion kontuari eta Andoain, Hernani, Lasarte-Oria eta Usurbilgo gazteok Amaiurrera antolatu genuen bidaitxo bat, egun-pasa bat aitzakia horrekin bertan elkartutako gazteok elkar ezagutu gintezen. Eta bertaratu zen klasekide batek egun-pasa hura baino aste batzuk lehenago komentatu zidan nola mugimendu edo ekimen hura sortu aurretik inor ez zela interesatzen Amaiurren pasa zenaz. Bera gazteluaren indusketa-lanetan ibili zen uda batez eta horregatik friki deitu ziotela esan zidan. Beraz historiaren inguruan interesatzen dena friki bat da? Egunero ikasten da zerbait. Eta ekimen horren baitan sortu zen giro hark gazteak pentsaraztera ematea baino honetarako balio izan zuen: euskal nazionalismoa eta independentzia nahia Amaiurren borrokatu zuten 200 soldaduen balentrian funtsatzen dela. Eta zergatik ez da oinarritzen Noainen borrokatu zutenenetan? Edo nafarren aliatu ziren frantsesetan? Eta oraindik buelta handiago bat emanik honi, zergatik gure independentzia ez da funtsatzen Pelayoren Covadongako altxamenduan eta altxamendu horren ondoren etorri zen Errekonkistan, Errekonkista horren parte delarik Gaztelak Nafarroa konkistatu izana?

 

Artikulu hau irakurtzen zoazen heinean akaso gogoratuko zara blog honetan ageri den "Leiendetan itsututa" artikuluan. Bertan nioen moduan, itsutu egin gaituzte. Mugimendu nazionalista bat bere arriskuan ikusten duenean sortzen da, populazio bat eta bere kultura arriskuan daudenean. Mugimendu nazionalista bat defentsa bat da, ez duzu zurea dena galdu nahi eta ondorioz zurearen gaineko kontrol osoa lortzeko formak bilatu eta errebeindikatzen dituzu. Eta gurearekin berdina gertatzen da. Gure kultura arriskuan ikusi dugunean independentzia oihukatzen hasi gara. Eta eskakizun horri funts bat ipintze aldera historian bilatzen ditugu gure oinarriak. Baina ezin dugu esan erromatarren aurka borrokatu zutenak edo herri indoeuroparrak Kantauriko zonalde honetan geldiarazi zituztenak direla gure nazionalismoaren edo independentziaren hasiera. Mesedez, ez gaitezen horrelako engainuetan erori.

 

Baina "Leiendetan itsututa" artikulu txikiaren edo nire pentsamenduaren ataltxo horri berriz heldurik, zergatik funtsatu behar gara iraganean? Iragana ez da existitzen, eta existitzen ez den zerbaitetan funtsatu behar ditugu gure izatearen oinarriak? Orain norbaitek pentsatuko du nondik atera dudan iragana ez dela existitzen dioen ideia hori. Ba erantzungo dizut baldin eta horrela pentsatu baduzu: Matthew Johnson arkeologoaren ideietatik hartu dut (Honen inguruan irakurri nahi baduzu: "Teoría arqueológica. Una introducción."). Nahiz eta absurdoan pentsatzea gustatzen zaidan, izan gaitezen praktikoak momentu batez, ez gaitzatela engainatu gure historiaren labirintoetan murgiltzen garen orotan. Independentzia nahi dugu. Zertan funtsatzen duzu zure nahi hori? Nahi horretan bertan, gutxi iruditzen zaizu?

 

Denbora eta indarra galduko dugu lortu nahi dugun hori lortzean leiendak, mitoak, heroiak, jainkoak eta dena delakoak idazten. Gure artean borrokatzen astia gero ere hor egongo da, baina faborez, goizean esnatzean aurpegia garbitzen den moduan, joan gaitezen komunera eta freskatu dezagun gure aurpegia eta ea ideiak argitzen zaizkigun.

 

Eta orain berriz ere youtube-ko bideoak ikusten jarraituko dut, akaso beste zerbait idazteko ideia otzen zait. Aurretik zigarro bat hala ere, mmmm, paketea hutsa dago? Beraz erosi egin beharko dugu etxe honetan beste inork ez baitu erretzen eta.

BURUARI GALDEZKA

Balkoira ateratzen naizen bakoitzean argi gehiago ikusten ditut leihoetan ipiniak. Koloretako argiak

piztu eta itzali egiten direnak. Kristalaren beste aldea zuhaitzen siluetak ikusten dira. Eta hotza

airean elurra egiteraino.

Plazetan zuhaitza handiak ipinarazi ditu udalak kolore gorrizko bolekin apainduta. Dendak goitik

behera apaindu dituzte, plaza nagusiak jaiotza montatu dute eta kanpai soinudun abestiak entzuten

dira tabernetako bozgoragailuetatik.

Telebistak ere ez du etenik gabonak anuntziatzeko garaian. Bada denbora iragarki komertzialak bata

bestearen atzetik ikusi ditudala denek opari egokiena eskaintzen. Olentzerorik ez dut oraindik ikusi,

itzultzen garenerako utziko dugu hau.

Baina egia esan behar badizut momentu honetan irakurtzen ari zaren irakurle, urtetik urtera grazia

gutxiago egiten nauten festak dira Gabonak. Horrela jarraitzen badu kontuak gorrotatzeraino iritsi

beharko dut, baina hau urte batzuetara edo askora tratatu beharreko gaia izango da.

Pentsatzen dut ene ikuspuntu hau argudiatu beharko dudala, gauzak esateagatik esatea bakarrik ez

omen da oso egokia. Baina ni izan beharrean zergatik ez zara zu nire ikuspuntua aztertzen saiatzen?

Erronka onartzen duzu? Ez baduzu onartzen ez duzu lerrook irakurtzen segi behar, denbora galtzea

izango baita.

Betiko argudiaketari hauts apur bat ken diezaiogun, egia da kontsumismoarekin duen lotura

ukaezina dela; masa-kontsumoa; berezko zituen baloreak galtzen ari dela; saltzen diguten irudi

estereotipatuak; zoriontasuna, bakea, maitasuna, laguntasuna bezalako hitz potoloak edozein ahotik

irteten direla; egungoak ez duela jatorrizko gabonen antzik ... Hau guztia seguru noizbait pentsatuko

zenuela. Eta iristen diren bakoitzero pentsatuko dituzu. Antolatuko dituzte han edo hemen

Gabonetako kontsumismoari buruzko hitzaldiak, Jainkoaren jaiotza ospatzeko elizkizunak ere

egingo dituzte, egunkari edo aldizkarietako artikuluetan irakurriko dituzu nola dena loturik dagoen

eta telebistaren edota filmeen bidez manipulatzen gaituztela estereotipoak, erritualak, erosketak eta

beste hainbat gauza urteko egun hauetan egin beharreko gauzak direla esanez.

Ez nator anti-gabonen esloganak egitera. Interneten egongo dira seguruenik nik hau idatzi aurretik

ere. Denbora galtzea litzateke, plagio bat egitea, nire gaitasunari muzin egitea. Eta hori ez dago

ongi, ez, ez ... hasi nahiz adar eta hodeietan barrena galtzen. Barkaidazu, ez zen nire asmoa. Segi

dezagun gurearekin oraindik irakurtzen ari bazara eta zerbait zentzuzkoa irakurri nahiko baituzu,

bada garaia eta.

Eta eslogan horiek irakurri nahi badituzu bila itzazu, esan bezala Interneten egongo dira. Edo akaso

manifestazio edo protesta bat antolatzen dute eta bertan oihukatuko dituzte. Ez, beste gauza bat dut

buruan sartuta, proposamen bat zuri egiteko. Eta honetarako aurreko guztia? Aurreko dena

irakurtarazi nauzu proposamen bat egiteko bakarrik? Lasai, nik idatzi egin dut, absurdoaren

goraipamen bat egiteagatik, beste batean azalduko dizut ideia hau.

Nire proposamena: gustoko dugu sarri azalpenak azaltzen dituzten moduan ikustea, baina ipin

diezaiogun berezko ukitu bat, Karlosek perrexilarekin egiten duen moduan. Jarri azalpen edo

ekintza orori zergatik bat aurretik. Afari eta bazkaritako janaria erostean, etxekoei edo lagunei

opariak egitean, gabon kantuak abestean, Urte Berriko erritualetan, Urte Zaharrez jateko zerbait

eskaintzean, lagunekin zerbait hartzera joatean, urte berria opatzean, bromaren bat egitean, errege

opila jatean ... galdegiozu buruari zergatik egiten duzun. Bitartean ongi bizi geroz eta egun gutxiago

geratzen baitira festarako.

 

 

Noaua! herri aldizkarirako idatzia

ITZULERA

Ez dakit zenbat bota nauzun faltan. Eta ez dut jakin nahi.
Hobe horrela gauzak isilpean gordetzea.
Ez duzu uste?
Horrela ikusten nauzunean
barruan gordetako dena instant batean azaleratuko da
eta imajinazioak eskain diezazukeena baino ederragoa izango da
itzulera.

UDABERRIKO HEGAZTIAK

Udaberriro lez hegaztiak nire etxe aurreko putzuan elkartu dira.
Neguan hegoaldeko lurretan egon ostean
iparralderako bidaia luzearen pausaldi bat.
Gaur udaberri da,
baina hegaztiak ez dira putzuan azaldu.
Edo ni ez naiz putzura gerturatu.

ROBINSON CRUSOEREKIN TOPATU NINTZENEKOA

Hondartzan paseoan nenbilenean
Robinson Crusoe topatu dut.
Konturatzerako munduak abandonatu nau.

ZERUETAKO ERREINUA: ANTIZIKLOIA VERSUS BORRASKA (VI)

ETA DENARI BUKAERA BAT

EMAN BEHAR BAITZAIO...

Azken finean

Peio Zabalak arrazoi zuen.

Borraskeroek mila sarraski egin zituzten neguan.

Euskal Herri osoa garaitu zuten,

nahi zuten moduan.

Orduan zer,

Borraska zapaltzailea da?

Noski

Putakume galanta.

Bai.

Kosas ke gertan.

Bai.

Orduan antiziklonista bazara, ezkerrekoa zara?

Ez dakit motel.

Borraska kapitalista hutsa da.

Akaso.

Ez al duzu zuk idatzi poesia arraro hau?

Bai. Poema galanta.

Orduan zerbait jakingo duzu?

Beno aspertu nak, banitxiek motel. Eongoatxik ta ayo!

 

ZERUETAKO ERREINUA: ANTIZIKLOIA VERSUS BORRASKA (V)

ERRIBERA, ERRIBERA

Eta inor gogoratzen ez den eremu zabal horietan

Antizikloiaren azken bataloiak esperoan daude.

- Hi! Esan gutxinen zein dittuken eremu hoiek!

Ez gaitukela goatzen motel!

- Behetik geratzen diren horiek:

piper, mahats, zainzuri eta pataten erreinuak.

- Batzuk ez gaituk hi bezain ilustratuk!

- San Ferminetako entzierroako anuntzioak ez al dituzue ikusten?

- Oandik festan eote gattuk motel!

Bo besteek ulertuko zuten.

Ordulariari begiratu

eta ez dator ez bataloi ez ezer.

 

- Kanta dezagun momentua alaitzeko!

Erriiibera, erriiiibeera, zure landen zaaaaabaaleeeraaaaaaa.

...oooooooooooooo....ooooo........oooooooo.......

- Azalduko dira horrelako batean ezta?

- Andoni Aizpuru ikusi al duzue?

- Ez. Zergatik?

- Ez zarete konturatu? Noiztik egiten du hemen euria uda erdian?

- Egia! (eskuak buru gainean jarriz)

- Orduan irabazi dugu!

- Gora Antizikloia!

PUN! (sekulako kolpea mahaiari)

Zergatik ez dugu ezer egin

Nafarroan eta Araban?

Badakizu uda da eta ezin gauza handirik egin.

Aitzakiak!

Lasai neguan denak garaituko ditugu,

Zergatik uste duzu dela Siberia Gasteiz?

Hobe horrela bada, bestela...

ZERUETAKO ERREINUA: ANTIZIKLOIA VERSUS BORRASKA (IV)

ZER DA IPARRALDEA?

Eta Bidasoako Errepublika Independientea garaitu ostean

Borraskeroak Hendaian sartu dira.

Eta beno...

Zer esango dut ba nik?

Laburbilduz:

Inguruko Antizikloiaren erresistentzia guztiak

garaitu dituzte.

 

- Baina zer demontre?

- Zer gertatzen da?

- Zerbait gehiago egongo da kontatzeko Iparraldeko bataloiaren inguruan ezta?

 

- Zer da Iparraldea?

- Baina zer ostia? Gero denak datoz “Gora Euskadi”ko txapelarekin Herri Urratsera!

Eta orain zer den Iparraldea galdezka?

- Kexarik bada erreklamazio orriak amaieran daude.

ZERUETAKO ERREINUA: ANTIZIKLOIA VERSUS BORRASKA (III)

LAINO GUZTIEN AZPITIK ETA SASI GUZTIEN...

SASIAK SUTARA!

Play musika

[Banda Sonora Gladiator]

Sollubetik tximistak erori dira.

Bilbotarrek eguzkia ez dute ikusten, laino Borraskeroek lapurtu diete.

Aireko erasoa hasi dute Borraskeroek

Gernikako ereduari jarraituz.

Antizikloi gudariak lurrera erortzen dira

oihuka

garrasika

negarrez

saminak pozoindurik

...

heriotzak deituko balitu bezala.

Euriz blai arnasa agortzen zaie eta begiak ixten dituzte.

4ever!

Gainontzeko gerlariak korrika atera dira Bilbotik ihesi

atzetik

Borraska dutelarik.

PIUN! PIUN! PIUN!

 

Basque Express! Basque Express!

Bilbo erori egin da! Bilbo erori egin da!

Borraskak lehen erresistentziak garaitu ditu!

 

Eta Bilboko errendizioaren ostean

Borraskeroek aurrera jarraitu dute ekialderantz.

Baina erresistentziaren bat oraindik bada landako inguruetan.

Begira! Han da Nekazarien matxinada!

Zer gertatu da ba?

Nekazariak Borraskeroen aurka azaldu direla.

Eta zergatik hori?

Kazkabarrarekin erasotu die eta baratzetako tomate guztiak

izorratu dizkiete.

Orduan putada galanta.

Putakume galantak bai!

Orain plastikozkoak jatera, inbernadero nazkagarri horietakoak!

Alternatibak nahi ditugu!

Produktu ekologikoen alde sina ezazu hemen!

Enpresa multinazional horien aurka, bertako produktuen alde!

 

Donostian galerna hasi da.

fufffffffffffffffff...fufffffffffff..fuuuuuuu[imajinatu haizea dela]

Giri guztiak korrika.

Hau fundamentua

Jesus, Maria eta Jose.

- Eh! Poesia hau antiklerikala da!

- Kontuz! Poesia munizipala datorrela!

- Enteratu zarete poesia nazionalak Borraskero direla?

- Putakume galantak!

- Antizikloia askatu! Antizikloia askatu!

Borraskeroek muga pasa dute.

A-8tik barrena datoz.

- Lasai orduan, ataskoren bat seguru dagoela!

- Lasai ez! Borraskeroak laino guztien azpitik eta sasi guztien gainetik ibiltzen dira!

- Orduan sasiak sutara eta ez dira gehiago ibiliko!

 

6 pm. Donostia kaos bat da!

Borraska kostatik dator!

Aldatu kanta... play

[Banda Sonora Pirates of the Caribbean]

Barku kortsarioetan moila hartu dute Borraskeroek

eta Alde Zaharrean barrena abiatu dira.

Ikatzen sagardo eta txakolin botilak airean

Borraskeroengana.

- Alde hemendik utzi bakean!

Alperrik ordea.

Artikutzako Borraskeroen laguntza heldu da.

- Jack Sparrowi deitu beharko diogu. Berak lagunduko digu!

 

- Aupa Joseina, aupa Jon Gotzon.

Bo gureko neukie jarriko bazenizkidaketezun eeeeee baaa...

Zera ba, jo si da super ezagune. Ahaztu egin dot izena.

Beno ba Sorotan Beleren disko berria antiziklonistei animatzeko.

- Baina Sorotan Beleren disko berria oso zaharra da.

- Eske Joseina estudiatzea da super fuerte

eta gero neuronak hiltzen dira.

- Orduan Antiziklonistentzat Sorotan Bele eta “Atalaia” kantua.

Impresionaaaaaaaaaaaaaanteeeeeeeeeeeeeeeeeeeeeeeeeeeeee

Eta hor dator Jack Sparrow 31tik barrena.

Ron botila eskuetan duela.

Hutsa.

Hori ez da fundamentua.

- Jack! Lagundu egin behar diguk Borraskeroen aurkako borrokan!

- Umm... beno... ehhh....rona baduzue?

- Guk txakolina.

- Ron gabe ez dago traturik!

- Ez hadi horren putakumea izan.

- Rona! BAI EDO EZ?

- Ez.

- Orduan hartu hau, akaso zerbaitetarako balio du.

Eta balantzaka iparrorratz bat ematen die.

Pixkanaka

denak

lurrera doaz.

Eta beren arima

go out of the universe.

Borraskeroek preso hartu dituzte azken antiziklonistak

eta Alde Zaharreko pintxo guztiak jan dituzte

txakolin eta guzti.

- Txakoliña, txakoliña Getariko erregiña!

- Ez al dezue ikasiko getayarrak geala?

ZERUETAKO ERREINUA: ANTIZIKLOIA VERSUS BORRASKA (II)

GUDAREN PRINTZIPIYUA

RING, RING, RING…

Telefonoa hartu eta Borraska beste aldean.

- Gaur Euskal Herria neurea izango duk!

Neuria da ta neuria da! Ieu

Neuria da ta neuria da! Ieu

- Hori ikusteko zagok- erantzun dio ahots ilun batek.

Eta arratsaldean Borraska... ska, ska, ska

Euskal preso eta iheslariak etxera! Euskal Herria mugitu!

- Kendu musika ostia!

Ba hori, Bizkaiatik, Somorrostroko mendietatik

Borraskaren bataloia:

Tximista and trumoia, krixton zaparra...

Azken finean eguraldi txarra.

- Egun on Peio.

- Baita zuri ere.

- Negurako zer diote tenporek?

- Aurten negu hotza nagusituko zaigu. Aizkorriko gaina laster ikusiko dugu txuri-txuri.

 

Antizikloi gudariak gara Antizikloia askatzeko

gerturik daukagu odola bere alde emateko.

Eguzkia ikusi da mendi tontorrean

goazen gudari danok A larriaren atzean.

 

Bien, bien...

Orduan Antizikloaren armada martxan jarri dela...

Glup, glup (rioja gorriari, reserba gainera)

Bilboko bataloia lehenengoan garaituko dugu.

Nerbioi ibaian barrena Alde Zaharreraino.

Ez da beraien arrastorik geratuko!

Glup, glup (kopa hustu du kasik)

Eta erresistentziarik bada, uholdeak 83an bezala!

 

Bilbo 4 pm.

Antizikloiaren erresistentziak... PREST!

Eguzkia...PREST!

Anti-zaparradak...PREST!

ZERUETAKO ERREINUA: ANTIZIKLOIA VERSUS BORRASKA (I)

Timy’s produktions poems presents

(...hemen lehoia doa berez, baina Athleticekoek ostu digute... )

ZERUETAKO ERREINUA

ANTIZIKLOIA VERSUS BORRASKA

By Anonimus

Jusef van Vinocelliren kolaborazioarekin

- Xexateyok hi? Noiz hastek pelikula?

- Ssssss... hau poesia irakurketa da.

- Barka zak beorrek, uste nin hau huala sala x.

- Hau sala y da. Sala x-ra joateko Pitagoras erabili behar da.

- Eskerrik asko motel (...) kalkuladora baek?

VIENA ITSASOARI BEGIRA

Trenak bere bidaiaren akaberan utzi ninduen,
kasik mundua amaitzen den eremu honetan. Horizontearen marraren gainean.
Itsasia ere hemen amaitzen da harrien aurka ezin duela aurrera egin.
Viena itsasoari begira.
Eraikin galaien antzokia. Mendien babespean
eta haien beste aldean zer den jakite arren
etxe txikiek
mendi magalak eskalatu dituzte.
Ezkutatzen dutena gehiago ezkutuan gera ez dadin.
Baina nik itsasoari begira jarraitzen dut
pentsamendu labirinto honetan,
uholde batek urperatu duen basamortuaren aurreran.
Eskaparateetako maniki bat banintza
geldirik.
Musika belarrietan. Musika ahoan.
Eta jakin gabe hasitakoa nola amaitu.
Beharbada trenak bezala. Errailak
amaitzen direnean.
Baina horretarako errailak eduki behar dira oinpean
eta nik aspaldi galdu nituen,
edo hori sineztarazi nahi diot nire buruari.
Eta momentu batez begirada altxatzean
harrizko dama bat leiho batean.
Austriar enperadoreen irudiak hormetan,
behin Austria izan ziren hormetan.
Baina orain banderek ez diote hori.
Eta tintak geratzeko eskatu dit.

GOGORATU

Gogoratu zerua kolorez apaintzeaz,
gauero deabruari adarrak ipintzeaz.
Amoranteen poemak sutan kiskaltzeaz,
infernuko ateak zabalik ahanzteaz.
Gogoratu tabernak isilik agurtzeaz,
orbel sikatuetan oinutsik dantzatzeaz.
Errepide alboko loreak ureztatzeaz,
kaiola erdoilduak airera botatzeaz.
Gogoratu eskuak laztanez mimatzeaz,
begipeko larrosak malkoez bustitzeaz.
Ipuin politenak erdizka abandonatzeaz,
hegan dauden muxuak kutxa batean gordetzeaz.
Gogoratu gogoratzeaz.

0:00

Badira segundoak

urteengandik aldatzen diren merkatu zaharrak,

armiarma sareen paradisuak.

Badira likore botila erdi hustuak

poeta mozkorren euripeko paseo bakartiak

oroitarazten dizkizutenak.

Izenak abandonatu dien naufragoen gutunak.

Badakizu ate atzeko panpinek ezin dutela negar egin,

baina goizero

malko pozoitsuetan itota aurkitzen dituzu,

maitasun gerretako desertoreak

whisky kopa batean gatibu geratzen diren moduan.

"Sous le pavés, la plage".

Gezurra da!

Gezurra da diozun guztia!

Ez zara jabetzen, baina gezurra da.

Julieta beste batekin joan da

eta Romeo putetxez putetxe dabil psikiatrikora bidean.

Berdin dio.

Berdin dio nola izena duzun.

Berdin dio zure adatsetan eskuak ezin baditut pausatu,

zure berba eztiarekin isili,

larrua larruarekin josi.

Beharbada arrazoi zenuen esan zenidanean

ez nintzela hemengoa.

Horregatik banoa. Auskalo nora.

Taberna batera seguruenik zigarro kea oxigeno molekulekin

larrutan ikustera.

Pentsatzera noa.

Pentsatzera zergatik den delitu bihotz bat okupatzea,

maitatzea,

gozatzea,

borrokatzea.

Orbel sikatuak estaltzen dituen maindire zuriak agur esatean

itzuliko naiz.

Itzuliko naiz.

Euria ari du eta aterkia ahaztu zait.

Udaberri da,

baina zure begipeko izotza ez da urtu.

Larregi da hotz egun hauetan.

Larreago zure belardietan.

HISTORIAKO APUNTEAK

 

Zer ote da Historia? Igande arratsaldez autobusa hartu Siberia aldera joateko hurrengo egunez asteari ahal den gogotsuen ekiteko. Arratsaldeko zortziak aldera ilun dago eguna urteko sasoi honetan eta libururen bat irakurtzen edo apunteak aztertzen edo besterik gabe musika baxu-baxu ipini belarri alboetan eta leihotik begira joan lo hartzen den arte. Eta horrelako une bakartietan pentsatzen jartzen zara ea zergatik sartu ote zinen lau urteko karrera horretan, zergatik Historia eta ez beste edozer gauza bizitzaren bide zidor guztiak gainditzea errazago egiten dutenak. Mikel Urdangarinen kantu malenkoliatsu batetik Freddy Mercury-ren ahotsera jauzi du erreproduzioak. Militantziagatik gauza gutxi egiten dira gaur egun.

Lehen urtean galdera horren erantzuna topatu nahian ibiltzen zara eta aje egunak besterik ez dira tokatzen begien parean bata bestearen atzetik. Ostegunak. Onak, oso onak direla diote adituek Gasteiz aldean. Kutxi eta Gaztetxia, katu baltzak toki guztietatik miauka. Eta goizetan, ahal den heinean lanak aurreratzeari ekiten diozu Bibliotekan, bidean lanera doazen trajedun gizonak gurutzatzen direlarik Daton barrena. Jubilatuak petankan. Eta liburuak irakurtzen dituzun bitartean aurreko ostegunean mosuak konpartitu zenituen neskarekin topo egiten duzu eta irri batekin agurtzen dizu “zortzietan Hala Bedin” izkiriatzen dutelarik bere ezpainek. Baina Historiari buruzko erantzunik ez duzu topatzen sazerdote drogazale eta ex-voto artean, ez eta Goi Erdi Aroko Inperio Frankoan ere. Irakasleak emandako bibliografia gomendagarrirako ere ez duzu paradarik topatzen Historiaurrekoak beste horrenbeste eta gehiago irakurtzea eskatzen baitizu. Baina hori sistemaren arazoak dira, komunikazioaren eta inkomunikazioaren arteko erlazioak.

Eta bigarren urterako lagun berriak ere ohiko bihurtzen zaizkizu. Eta askotan irakaslearekin baino gehiago ikasten duzu beraiekin bazkari eder baten konpainian garagardo eta zigarro artean. Orduan konturatzen zara garaituak beti idazten dakiela, baina orri beltzak ez dituela haizeak urratzen. Eta saiatzen zara irakaslea irteera bako kaleetara eramaten eta zure ezagutza berea baino handiagoa dela erakusten, baina alderdi ilunenean gordeta dituen kartan mahai gainean pausatzen dituenean emeki begirada koaderno gainean ezartzen duzularik esandakoa onartu ostean berau orri zuriaren gainean idazteko. Auto istripu bat dagoela dirudi Aretxabaleta parean, stand by me. Konturatzerako Araban gaude.

Horrelako uneetatik ikasten zure artxibo propioa handitzen doa eta jada konturatzen hasten zara hasieratik planteatutako galdera oker plantatuta dagoela. Ez da zergatik sartu zaren Historia ikastera gainontzeko guztiek erotzat hartzen zaituzten bitartean sufritu zutelako bere garaian azterketa gainditzeko. Kontua da zer eskain diezaiokezun albokoari Historiaren bitartez. Medikuek pertsonak sendatzen dituzte edo mina arindu lehenengoa ezin bada burutu. Historialariak gizartearen iragana aztertzen du soziologoenak ez dezan berriz ere harri berberarekin tupust egin. Baina Kulturan inbertitzea zaldi elbarriaren alde apostu egitea bezalakoa dela pentsatzen dutenez eta krisiaren eta terrorismoaren aitzakiak ipintzen dituztenez garai hauetan, ba historia plazer duenaren militantziaren arabera zabaltzen da gizarte osora. Akaso iragana (berez existitzen ez dena) ezkutatu nahi dutelako edo bestela gustatu egin zaigulako harri berarekin tupust egitea.

Iritsi gara helmugara, Calle Melancolia live, zerbait afaldu eta laster ohera bihar egun gogorra, eta seguruenik oso hotza izango baita.